shb

此文章由Rosie Beauty 店主親手打，請其他人自重，勿隨意抄襲或轉載。

＊打呢篇文嘅目的唔係要嚇大家，係想大家有個心理準備，有皮膚病難免會時好時差，大家要學會接受，接受左又係生活各方面做好，其實想皮膚穩定都無難度架！

好多人都問我玫瑰痤瘡、濕疹有無得斷尾，我以個人經驗會話「無！」，醫生們有D話無有D話有。打個比喻，其實玫瑰痤瘡、濕疹、問題肌，好似感冒一樣，天氣轉涉親，抵抗力差D，個排壓力大訓得唔好都會病（當然病嘅途經好多，可以細菌感染，可以係病毒性，呢個唔係我想指出嘅範圍）無人會問，感冒有無得斷尾？

 

1.護膚

話明皮膚問題，護膚一定唔少得。點樣護膚？用咩成份嘅護膚品？點樣選擇？都係一大學問。

最基本玫瑰痤瘡、濕疹，我個人一定會避免酸類產品，例如水楊酸、果酸等等，個人經驗，輕則紅左敏感，重則變含膿大暗瘡⋯⋯

世界上無一樣護膚品適合100%所有人用，好似花類係中性，但有人都會有花粉症；又或者花生係

簡單不過嘅食物，但都有人食左嚴重會死。

當您搵到合適嘅護膚品，的確要恭喜自己，因為十個客有九個客都會問店主：「我搵左好耐產品都唔合適，有時醫生俾我嘅都唔work。」所以，話搵護膚品都要耐性同勇氣，有時護膚品都係其中一關，幾百蚊價錢唔可以奢望搽完永遠好返～～店主幾時都好中肯，唔會話用完一定work，一定要試左先知，唔係客套說話，只係因為負責任。

 

2. 食物來源

店主之前post 都提過其實大家食梗嘅食物都估唔到有咁多化學物質，都係個句「唔係嚇你！」，只係事實而已。我地每日食嘅食物包括味精（對濕疹、敏感肌反應比較大）、色素、防腐劑、基因改造食物（蕃茄、粟米、薯仔等）、高油高脂、激素雞翼等等⋯⋯

您會話「車！個個人都係咁食，點解人地無事？」如果本身有皮膚病嘅人，不停累積累積累積，再加上其他誘因就會無啦啦發出現黎，你就會問「我之前皮膚好好架喎，點解無啦啦有？」同埋，其實愈來愈多人會有皮膚問題，佢面化左妝好靚皮膚好好，但其實佢身體有濕疹你唔知。

好多人同我講「我戒得好清架啦⋯⋯」其實只要您出街食，您就唔知自己食左D咩，唔知佢落咩味精、落咩味、用咩材料，其實連一碗白粥都可以落味精架。可以戒口唔係戒得清嘅問題，戒口係輔助一part，但戒左口唔代表唔會再發，但的確係有助穩定病情。

店主都係唔會戒得清嘅人，係要戒得對。出街食多左，係屋企就食返清淡D做一個balance，同埋咩都唔食，你無均衡營養，其實都唔夠免疫力，舉個例子，omega 3 同 omega 6 失衡反而會加劇炎症。

除非您餐餐係屋企食，餐餐煮有機食物，但提提您水係無有機嘅定義，您又要不停過濾佢，咁先避得過食物問題，但咁樣人生開心嗎？同朋友聚會又取消唔去？每次食野都有壓力？咁樣又會造成另一個問題了。

3. 天氣轉變＋空氣污染

皮膚仲係要人體最大器官，長期接觸空氣，包括有濕度變化、空氣污染、外在刺激物等⋯⋯

掂到塵又痕、掂到污糟野又敏感。

我唔知大家有無發覺空氣係差左好多，你去離島個種空氣先叫正常，但一入市區，你吸嘅空氣都好似令你好唔舒咁！

曾經有一排我係荃灣望出去汀九個邊，好似有沙塵暴咁，就知空氣幾咁污染。

空氣污染係累積，你慢慢唔覺，唔係嘅話點解地盤工人係長年累月吸入沙塵，之後會有肺病。

其實皮膚都係一樣，佢面積係最大，而且直接掂到空氣，有時抵抗力差D，或者污染嚴重D又會起風疹，或者令到皮膚好敏感⋯⋯

然後，就係天氣轉變。香港天氣潮濕唔再講，一年有四季，即係隔幾個月，天氣又會變一次。

加上，全球氣溫上升，厄爾尼諾等極端天氣現象成日出現。可以一日經歷四季，又或者2日好凍3日又好熱，又熱又凍，又乾又濕。

客人成日問，我咩都無做過，點解都咁唔穩定，天氣轉變係一個好重要因素。試想像一個咁堅硬嘅石頭，經過長年累月嘅乾濕交替都會風化同裂開，我地咁脆弱嘅皮膚係首當其衝！

天氣乾濕直接影響相對濕度，過濕面又笠，過乾又鞋烚烚！

大家要知道天氣轉變、空氣污染好難去逆轉，都係我地無法改變嘅因素，唯一方法係增強自身免疫力，遇到時可以減少發病程度、機會。

4. 自身壓力

自身壓力係可以自己控制到，但又真係好難控制。首先香港工時好長，人又好多，好難係咁嘅環境下好放鬆，最多六日自己調劑下。

樓價貴、工作壓力大，已經成為港人嘅label。而且有邊個女仔唔緊張自己塊面，一發病係咁照鏡，成日諗佢，呢D全部都係壓力！壓力！壓力！

成日想佢快D好已經係一個好大嘅壓力。

壓力呢樣野好虛無，有時連自己都唔知。壓力，再知天氣轉變，簡直係地獄！

店主認為壓力係好重要嘅主因之一，因為身體會排左壓力係第一位，用左資源去抗壓，所以點解壓力大，抵抗力就會低。壓力大好影響腸胃、荷爾蒙等等好關鍵嘅身體問題。

壓力大會令皮膚油脂分泌旺盛左，容易有暗瘡出現。

好多人都話放鬆好難，的確係架！

所以，只要睇開D，唔再諗，皮膚出奇地正常，even 會靚左架！

5. 基因

呢個都係無法逆轉嘅問題，由出生個刻已經決定左。家族遺傳真係好難醫治，所以都有醫生曾經指出皮膚病都係基因病，再加埋上面咁多因素，解釋左好多人嘅問題「我之前明明皮膚好好架，點解宜家會變成咁？！」

「點解我時好時壞」中醫西醫咩都試過哂都係咁⋯⋯所以我地一直追求唔係完美，係健康同穩定，只要所有野配合到，其實都唔係話一定會好差！

6. 自身處理引致

例如去做矽針、碳激、高能量激光、打針、暴曬等等，都有可能引起玫瑰痤瘡、濕疹發作。

大家一定係唔想，但有時D野真係唔做唔知，所以真係要考慮清楚！

 

7. 錯誤治療

如長期錯誤使用類固醇、A酸、果酸等藥物⋯⋯
令皮膚好難修復。